Галоўная славутасць Браслава – гэта гарадзішча Замкавая Гара. Тут у VIII – ІХ стст. узнікла латгальскае паселішча, якое ў ХІ ст. было заменена на магутную памежную крэпасць Полацкага княства. У перыяд Вялікага княства Літоўскага на гарадзішчы знаходзіўся драўляны абарончы замак, які з’яўляўся і грамадска-палітычным цэнтрам Браслаўскага павета. Браслаўская Замкавая Гара – адно з самых выразных гарадзішчаў на тэрыторыі Беларусі. Да таго ж, гэта цудоўная аглядальная кропка. Гарадзішча з’яўляецца асноўным экскурсійным аб’ектам горада.

Аднак на працягу дзесяцігоддзяў уладам не ўдаецца вырашыць праблему прыстойнага ўтрымання гарадзішча. Тут шмат смецця, выпасваецца жывёла, наладжваюцца п’янкі. Замкавай Гары не хапае ўвагі, невялікіх арганізацыйных і фінансавых высілкаў. Цяперашнія ўлады не любяць дробязей.

Нарадзілася ідэя – збудаваць на гарадзішчы драўляны замак. Ідэя пачварная і разбуральная. Ніякіх гістарычных падстаў для аднаўлення замка не існуе. Асобныя будаўнічыя працы нанясуць шкоду рэальнаму гістарычнаму помніку. Можна ўявіць новабудоўлю праз дзесятак гадоў існавання і экспедыцый. Тым, хто марыць аб паветраных замках, трэба апусціцца ўніз і прайсціся па вулачках гарадка – грошы патрэбны на тэрміновы рамонт асфальту. Па некаторых вуліцах папросту цяжка праехаць. Такога занядбанага стану горада не было здаўна.

А што да Замкавай Гары, то на абарону гарадзішча павінны ўстаць усе, каму не абыякава наша гістарычная спадчына.